سياسة الخصوصية
تطبيق سُفرة — آخر تحديث ٣ أكتوبر ٢٠٢٦
البيانات اللي عندنا
- الحساب: الاسم والإيميل اللي بييجوا من آبل أو جوجل وقت الدخول. لو اخترتوا تخفوا إيميلكم في آبل، بنحتفظ بالعنوان المستعار اللي بتديه لنا بدل إيميلكم الحقيقي.
- تفضيلات الأكل: الميزانية، أيام الطبخ، أيام البروتين، المطابخ المفضّلة، وقايمة «أكل مابناكلوش».
- خطط الأكل الأسبوعية، وطلبات البيت اللي بتتكتب في التطبيق.
- كود الإشعارات بتاع الجهاز، وده بس لو الإشعارات شغّالة.
استخدام التطبيق
بنسجّل خطوات استخدام التطبيق — رقم عشوائي للجهاز، نوع الجهاز، نسخة التطبيق، وحاجات زي «فتح التطبيق» و«عرض الخطة» و«فتح وصفة» — عشان نعرف إيه اللي نافع وإيه اللي محتاج تحسين. الخطوات دي مربوطة بحسابكم طول ما الحساب موجود، حتى اللي اتسجّل قبل الدخول على الحساب. البيانات دي بتروح لسيرفر سُفرة نفسه، مش لشركة تحليلات تانية، وبتتمسح بعد مدة محدودة، ولما تمسحوا الحساب بيتشال الربط بيكم.
ولو التطبيق وقع أو حصلت مشكلة، بيتبعتلنا تقرير بالغلط اللي حصل والشاشة اللي كنتوا فيها — من غير أي بيانات شخصية ولا أسامي ولا أي حاجة كتبتوها — عشان نعرف نصلّحه.
الإعلانات
سُفرة بيعرض إعلان وقت فتح التطبيق، وإعلان لما ترجعوا للتطبيق بعد ما يكون قافل شوية — بحد أقصى ٦ إعلانات في اليوم، وبين إعلانات الرجوع نص ساعة على الأقل. الإعلانات بتيجي من جوجل (Google AdMob)، وجوجل بتستخدم «رقم الإعلانات» بتاع الجهاز ومعلومات عن الجهاز عشان تختار الإعلان وتمنع تكراره، وده بيخضع لسياسة الخصوصية بتاعة جوجل.
مفيش إعلانات جوّه الوصفات ولا قبل الفيديوهات، ومفيش بيع لبياناتكم لأي حد.
لو الجهاز في أوروبا أو بريطانيا، هيظهر سؤال عن الموافقة على استخدام البيانات في الإعلانات قبل ما يتعرض أول إعلان.
الفيديوهات
طريقة كل أكلة بتتعرض من يوتيوب جوّه التطبيق، والمشاهدة بتخضع لسياسة الخصوصية بتاعة جوجل. الوصفات والفيديوهات لأصحابها من الشيفات، ولهم كل الحقوق.
الإشعارات
الإشعارات اختيارية، وبنستخدمها بس عشان نفكّركم بالأكل. بتوصل عن طريق جوجل (Firebase Cloud Messaging)، وبتتقفل في أي وقت من الإعدادات.
مسح البيانات
مسح الحساب وكل البيانات متاح في أي وقت من الإعدادات › حسابكم، والمسح نهائي. بعد المسح بتفضل الأرقام المجمّعة عن استخدام التطبيق من غير أي حاجة تربطها بيكم.
ولو مش قادرين تفتحوا التطبيق، ابعتوا لنا على sofra@ehab-ezzat.com من نفس الإيميل اللي داخلين بيه، وهنمسح الحساب خلال ٣٠ يوم على الأكثر ونبعتلكم تأكيد. التفاصيل كلها على api.sofra.ehab-ezzat.com/delete-account.
بناخد نسخة احتياطية من قاعدة البيانات كل يوم عشان نقدر نرجّع الخدمة لو حصلت مشكلة، والنسخ دي بتتمسح لوحدها في مدة أقصاها ٣٠ يوم — يعني أي بيانات مسحتوها بتختفي منها في المدة دي.
أي تحديث على السياسة دي هيظهر على الصفحة دي وجوّه التطبيق.